Toshkent ko‘chalariga atmosfera havosining sifat ko‘rsatkichini doimiy e’lon qilib boradigan tablo va monitorlar o‘rnatiladi. Bu haqda Shavkat Mirziyoyev raisligida 29-yanvar kuni o‘tkazilgan videoselektor yig‘ilishida ma’lum qilindi.
Qayd etilishicha, poytaxtda og‘ir yuk mashinalari, 10 yildan oshgan avtomobillar hamda “Yevro-4”dan past yonilg‘idan foydalanishning ekologiyaga ta’sirini kamaytirish bo‘yicha aniq mexanizmlar ishlab chiqiladi.
Kelgusi besh yil davomida Toshkent shahri va unga tutash Toshkent viloyati tumanlarini to‘liq yashillik bilan qoplashni nazarda tutuvchi kamida 3 ming gektar “yashil belbog‘” va 200 gektar “yashil bog‘lar” tashkil qilinadi.
Toshkent shahrida atmosfera havosiga ko‘rsatilayotgan salbiy oqibatlarni kamaytirish maqsadida “Yevro-4” standartidan past ekologik toifadagi motor yonilg‘idan (Аi-80 rusumli benzin) foydalanishni taqiqlash va atmosfera havosining sifat ko‘rsatkichini doimiy eʼlon qilib boradigan tablo va monitorlar o‘rnatish Ekologiya, atrof-muhitni muhofaza qilish va iqlim o‘zgarishi vazirligi takliflarida ham keltirilgandi.
“Yuksalish” harakati ham havo ifloslanganlik holati haqida aholini xabardor qilib borish bo‘yicha keng ko‘lamli targ‘ibot ishlarini o‘tkazish taklifini bergandi.
Izoh (0)