Тошкент кўчаларига атмосфера ҳавосининг сифат кўрсаткичини доимий эълон қилиб борадиган табло ва мониторлар ўрнатилади. Бу ҳақда Шавкат Мирзиёев раислигида 29 январь куни ўтказилган видеоселектор йиғилишида маълум қилинди.
Қайд этилишича, пойтахтда оғир юк машиналари, 10 йилдан ошган автомобиллар ҳамда “Евро-4”дан паст ёнилғидан фойдаланишнинг экологияга таъсирини камайтириш бўйича аниқ механизмлар ишлаб чиқилади.
Келгуси беш йил давомида Тошкент шаҳри ва унга туташ Тошкент вилояти туманларини тўлиқ яшиллик билан қоплашни назарда тутувчи камида 3 минг гектар “яшил белбоғ” ва 200 гектар “яшил боғлар” ташкил қилинади.
Тошкент шаҳрида атмосфера ҳавосига кўрсатилаётган салбий оқибатларни камайтириш мақсадида “Евро-4” стандартидан паст экологик тоифадаги мотор ёнилғидан (Аи-80 русумли бензин) фойдаланишни тақиқлаш ва атмосфера ҳавосининг сифат кўрсаткичини доимий эълон қилиб борадиган табло ва мониторлар ўрнатиш Экология, атроф-муҳитни муҳофаза қилиш ва иқлим ўзгариши вазирлиги таклифларида ҳам келтирилганди.
“Юксалиш” ҳаракати ҳам ҳаво ифлосланганлик ҳолати ҳақида аҳолини хабардор қилиб бориш бўйича кенг кўламли тарғибот ишларини ўтказиш таклифини берганди.
Изоҳ (0)