Eronda Isroil razvedkasiga ishlash va mudofaa inshootida terakt tayyorlashda ayblangan to‘rt kishiga nisbatan o‘lim jazosi ijro etildi. Bu haqda Mizan axborot agentligi xabar berdi.
Sud qaroriga ko‘ra, qatl etilganlar “Mossad” (Isroil davlat razvedkasi) bilan aloqador bo‘lgan va Isfahondagi snaryad ishlab chiqarish zavodida portlash uyushtirishni rejalashtirgan. Hukm 29-yanvar kuni ertalab amalga oshirildi.
Kurdistonlik to‘rt kishi “sionistik rejim bilan hamkorlik qilish”, “qonunbuzarlikni yoyish” va terrorchilik guruhida ishtirok etishda aybdor deb topildi. Mahkumlar hukm ustidan shikoyat qilishga uringan, biroq ularning shikoyati rad etilgan. Qatl Tehron shimolidagi qamoqxonada amalga oshirilgan.
Eronning amaldagi rejimiga muxolif bo‘lgan Iran International telekanali xabariga ko‘ra, to‘rt erkak 2022-yil yozida mamlakatga noqonuniy kirib kelish va terakt tayyorlashda ayblanib, hibsga olingandi. Eron xavfsizlik rasmiylarining da’vo qilishicha, qatl etilganlar “Mossad” lagerlarida tayyorgarlikdan o‘tgan va bir necha bor Afrika mamlakatlarida Isroil razvedkasi uchun missiyalarni bajargan. Inson huquqlari tashkilotlari qatlni qoralab, mahkumlar qiynoqlar ostida ko‘rsatma berganini ta’kidladi.
BMT ma’lumotlariga ko‘ra, 2023-yilda Eronda 834 kishi qatl etilgan. 2023-yil 22-dekabrdan 2024-yil 21-yanvargacha bo‘lgan bir oy ichida mamlakatda 90 kishiga nisbatan o‘lim jazosi ijro etildi.
Izoh (0)