Эронда Исроил разведкасига ишлаш ва мудофаа иншоотида теракт тайёрлашда айбланган тўрт кишига нисбатан ўлим жазоси ижро этилди. Бу ҳақда Мизан ахборот агентлиги хабар берди.
Суд қарорига кўра, қатл этилганлар “Моссад” (Исроил давлат разведкаси) билан алоқадор бўлган ва Исфаҳондаги снаряд ишлаб чиқариш заводида портлаш уюштиришни режалаштирган. Ҳукм 29 январь куни эрталаб амалга оширилди.
Курдистонлик тўрт киши “сионистик режим билан ҳамкорлик қилиш”, “қонунбузарликни ёйиш” ва террорчилик гуруҳида иштирок этишда айбдор деб топилди. Маҳкумлар ҳукм устидан шикоят қилишга уринган, бироқ уларнинг шикояти рад этилган. Қатл Теҳрон шимолидаги қамоқхонада амалга оширилган.
Эроннинг амалдаги режимига мухолиф бўлган Iran International телеканали хабарига кўра, тўрт эркак 2022 йил ёзида мамлакатга ноқонуний кириб келиш ва теракт тайёрлашда айбланиб, ҳибсга олинганди. Эрон хавфсизлик расмийларининг даъво қилишича, қатл этилганлар “Моссад” лагерларида тайёргарликдан ўтган ва бир неча бор Африка мамлакатларида Исроил разведкаси учун миссияларни бажарган. Инсон ҳуқуқлари ташкилотлари қатлни қоралаб, маҳкумлар қийноқлар остида кўрсатма берганини таъкидлади.
БМТ маълумотларига кўра, 2023 йилда Эронда 834 киши қатл этилган. 2023 йил 22 декабрдан 2024 йил 21 январгача бўлган бир ой ичида мамлакатда 90 кишига нисбатан ўлим жазоси ижро этилди.
Изоҳ (0)