Ukraina prezidenti Vladimir Zelenskiy 2021—2022-yillar uchun daromadlari to‘g‘risidagi deklaratsiyalarini e’lon qildi. Bu haqda Ukraina rahbari matbuot xizmati xabar berdi.
2021-yilda prezident va uning oilasi 10,824 million grivna (2021-yil yakunidagi kurs bo‘yicha deyarli 398 ming dollar) daromad olgan, shundan 5 milliondan ortig‘i ichki davlat obligatsiyalarini sotishdan tushgan daromaddir. Qolganlari — ish haqi, bank foizlari va ko‘chmas mulkni ijaraga berishdan olingan daromadlar. 2020-yil bilan solishtirganda daromad 11,922 million grivnaga kamaydi, deya taʼkidlaydi Zelenskiy matbuot xizmati. O‘shanda prezidentning oilasi 22,7 million grivna yoki 2021-yil mart oyidagi kurs bo‘yicha 815 ming dollar ishlab topgandi.
2022-yilgi deklaratsiyaga ko‘ra, o‘sha yili Zelenskiy va uning oilasi daromadi 2021-yilga nisbatan uch baravar kamaygan – 3,692 million grivna (98 ming dollar). Prezident ofisi daromadning kamayishini Rossiya bosqini tufayli “Ukrainadagi ijara shartnomalarining vaqtinchalik bekor qilingani” bilan izohlamoqda.
2022-yil sentyabrida La Stampa gazetasi Italiyaning Forte-dei Marmi kommunasida Zelenskiylar oilasiga tegishli villani ijaraga olishni tashkil qiluvchi agentlikka Rossiyadan kelgan mijozlar bilan muzokaralar olib borish taqiqlangani haqida yozgandi.
Zelenskiy bir qator savdo belgilarining egasi bo‘lib qolmoqda, — dedi prezident ofisi.
Ukrainada deputatlar va amaldorlar uchun majburiy daromad deklaratsiyasi urush boshlanganidan keyin vaqtincha to‘xtatilgandi. 2023-yil sentyabr oyining boshida Oliy Rada majburiy elektron deklaratsiyalarni tiklash to‘g‘risidagi qonunni qabul qildi, biroq deklaratsiyalar reyestrini yana bir yilga jamoatchilikka yopib qo‘ydi. UNIAN xabariga ko‘ra, Zelenskiy yopiq reyestr qabul qilinishi mumkin emasligini ta’kidlab, qonunga veto qo‘ygan. Rada prezident kiritgan tuzatishlarni qabul qildi va uni jamoatchilik uchun ochdi.
Izoh (0)