Tesla bosh direktori Ilon Mask agar savdo to‘siqlari o‘rnatilmasa, Xitoyning avtomobil ishlab chiqaruvchi kompaniyalari global raqobatchilarni “yo‘q qilishini” aytdi. AQSH elektromobillar bozori yetakchisi butun dunyo bo‘ylab o‘z ishtirokini kengaytirishga intilayotgan BYD kabi kompaniyalar bilan raqobatga duch kelayotganini taʼkidladi.
Xitoy avtomobil kompaniyalari eng raqobatbardoshga aylandi va mamlakatdan tashqarida sezilarli muvaffaqiyatlarga erishmoqda”, —dedi Mask. “Agar savdo to‘siqlari o‘rnatilmasa, ular dunyodagi boshqa avtomobil kompaniyalarini deyarli yo‘q qiladi. Ular juda yaxshi”.
Mask o‘tgan yili Tesla daromadini kamaytirish bilan investorlarni xavotirga solib, narxlar urushini keltirib chiqargandi. 24-yanvar kuni Mask Tesla “xarajatlarni kamaytirishning tabiiy chegarasiga” erishayotgani haqida ogohlantirdi.
Maskning aytishicha, uning kompaniyasi kelasi yili yangi model ishlab chiqarishni boshlaydi — Reuters manbalari bu hozirgi avtomobillardan arzonroq bo‘lishini ta’kidlamoqda.
Tadbirkorning ushbu bayonoti Tesla sotuvlari o‘sishi sekinlashgan va daromadlar tahlilchilarning prognozlariga mos tushmayotgan bir paytda yangradi.
Yevropa Ittifoqi o‘z avtomobil firmalarini davlat yordamidan foyda ko‘radigan xitoylik raqobatchilardan himoya qilish-qilmaslik haqida bosh qotirmoqda.
Ayni paytda, AQSH prezidenti Jo Bayden Xitoyning sanoatda hukmronlik qilishiga yo‘l qo‘ymasligini aytgan. Uning bu yilgi prezidentlik saylovlarida kutilayotgan raqibi Donald Tramp esa barcha import tovarlariga bojlarni oshirishni va’da qilgan.
Izoh (0)