Наманган ва Андижон вилоятларида электр энергияси тармоқларига ноқонуний уланиш ҳолатлари фош этилди, деб хабар беради Бош прокуратура ҳузуридаги департамент.
Маълум қилинишича, департаментнинг Янги Наманган туман бўлими томонидан терговга қадар текширув ўтказилган. Текширувда “Гулистон” МФЙда яшовчи фуқаро Д.О. яшаш хонадонида ҳеч қандай ҳужжатсиз тижорат мақсадида компьютер ўйинлари хизматини ташкил этиб, компьютерларни умумий фойдаланишдаги электр тармоғига улаб, жами 177 миллион сўм электр энергиясидан ноқонуний фойдалангани аниқланган.
Шу каби, департаментнинг Асака туман бўлими томонидан туман ЭТК ходимлари билан ҳамкорликда ўтказилган тезкор тадбирда “Ш.Б.” фермер хўжалиги раҳбари М.Ш. ҳеч қандай ҳужжатсиз иккита сув насосини тижорат мақсадида умумий фойдаланишдаги электр тармоғига улаб, жами 153 миллион сўм электр энергиясидан ноқонуний фойдаланганлиги аниқланган.
Шунингдек, терговга қадар текширувда Асака туман ЭТК муҳандиси Ф.Я. фермер хўжалиги раҳбари М.Ш.нинг ишончига кириб, электр ҳисоблагич ўрнатиб бериши ҳамда ҳужжатларини расмийлаштириб бериш эвазига 13 миллион сўмни фирибгарлик йўли билан қўлга киритгани аниқланган.
Худди шундай, департаментнинг Шаҳрихон туман бўлими томонидан “Ўзэнергоинспекция”ва ЭТК ходимлари билан ҳамкорликда ўтказилган тезкор тадбирда “Ў.Ш.” фермер хўжалиги раҳбари М.А. ҳеч қандай ҳужжатсиз иккита сув насосини умумий фойдаланишдаги электр тармоғига улаб, жами 106 миллион сўм электр энергиясидан ноқонуний фойдалангани маълум бўлган.
Мазкур ҳолатлар юзасидан Жиноят кодексининг 168-моддаси (фирибгарлик) ва 169-моддаси (ўғрилик) билан жиноят ишлари қўзғатилиб, тергов ҳаракатли ўтказилмоқда.
Аввалроқ Самарқандда ноқонуний олтин қазувчилар 753 млн сўмлик электр энергиясини ўғирлагани маълум бўлганди.
Изоҳ (0)