Andijon va Navoiy viloyatlarida elektr energiyasi hamda tabiiy gaz tarmoqlariga noqonuniy ulanish holatlari fosh etilmoqda, deb xabar beradi Bosh prokuratura huzuridagi departament.
Ma’lum qilinishicha, departamentning Jalaquduq va Marhamat tumani bo‘limlari tomonidan ETK xodimlari bilan hamkorlikda tergovga qadar tekshiruvlar o‘tkazilgan. Tekshiruvlar davomida yakka tartibdagi tadbirkor O.S., “M.A.” MCHJ masʼul shaxslari va “S.” fermer xo‘jaligi rahbari A.O. umumiy foydalanishdagi elektr tarmoqlariga o‘zboshimchalik bilan tijorat maqsadida ulanib, jami 266,5 million so‘mlik elektr energiyasidan noqonuniy foydalangani aniqlangan.
Shu kabi, departamentning Andijon shahar va Qiziltepa tuman bo‘limlari tomonidan o‘tkazilgan tergovga qadar tekshiruvlarda “R.f.” MCHJ masʼul shaxslari hamda fuqarolar Z.K. va N.J. umumiy ovqatlanish shoxobchasi va noturar binosini hech qanday hujjatsiz umumiy foydalanishdagi gaz tarmog‘iga ulab, jami 124,7 million so‘mlik tabiiy gazdan noqonuniy foydalangani ma’lum bo‘lgan.
Mazkur holatlar yuzasidan Jinoyat kodeksining 169-moddasi (o‘g‘rilik) bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq O‘zbekistonda dekabr oyining 15 kunida ayrim iste’molchilarning elektr energiyasi va tabiiy gazdan noqonuniy foydalanishi natijasida davlat manfaatlariga 73 milliard 274 million so‘mlik zarar yetkazilgani to‘g‘risida xabar berilgandi.
Izoh (0)