Slovakiya Yevrokomissiyaning Ukrainani 2024-2027-yillar davomida to‘rt yillik muddatga qo‘llab-quvvatlash uchun 50 milliard yevrolik Ukraina jamg‘armasini yaratish taklifini qo‘llab-quvvatlaydi.
Bu haqda Ukraina bosh vaziri Denis Shmigal Slovakiya bosh vaziri Robert Fitso bilan uchrashuv yakunlari bo‘yicha bayonotda ma’lum qildi.
Xususan, Shmigalning aniqlik kiritishicha, ular Fitso bilan birgalikda bir qator masalalar bo‘yicha kelishuvga erishishga muvaffaq bo‘lishgan.
“Slovakiya Yevropa Ittifoqi tomonidan Ukrainaga 50 milliard yevro ajratishni nazarda tutuvchi “Ukraina Facility” dasturini qo‘llab-quvvatlaydi”, — dedi Shmigal.
Bundan tashqari, Ukraina bosh vaziri ta’kidlaganidek, Fitso Ukrainaning Yevropa integratsiyasiga intilishlarini to‘liq qo‘llab-quvvatlashini ma’lum qilgan.
“Slovakiya hukumati Ukrainaning mamlakat korxonalaridan qurol va o‘q-dorilar sotib olishiga to‘sqinlik qilmaydi”, — deb ta’kidladi Shmigal.
“Ukraina va Slovakiya mamlakatlarimiz xavfsizligi va farovonligi yo‘lida samarali hamkorlikni davom ettiradi”, — deya qo‘shimcha qildi Vazirlar mahkamasi rahbari.
Ukraina hukumati rahbarining so‘zlariga ko‘ra, Ukraina ushbu og‘ir damlarda yordam berayotgan slovak xalqidan minnatdor.
Uchrashuv davomida, shuningdek, Slovakiyaning Ukrainani minalardan tozalashda ishtirok etishi muhimligi tasdiqlandi. Bundan tashqari, Fitso Ukraina prezidenti Vladimir Zelenskiyning Tinchlik formulasini qo‘llab-quvvatlashini bildirdi.
Izoh (0)