Ekologiya, atrof-muhitni muhofaza qilish va iqlim o‘zgarishi vazirligi Sog‘liqni saqlash vazirligi bilan hamkorlikda O‘zbekistonda atmosfera havosi sifati monitoringi bo‘yicha milliy platforma va mobil ilovani ishlab chiqishga qaratilgan loyiha amalga oshirilmoqda.
Unga ko‘ra, havodagi mayda zarrachalar miqdori va ularning aholiga ta’siri bo‘yicha milliy havo sifati standartlari ishlab chiqiladi. 2023-yilda loyiha doirasida Surxondaryo, Buxoro, Xorazm viloyatlari va Qoraqalpog‘iston Respublikasida aholining atmosfera havosi ifloslanishidan kasallanish darajasini o‘rganish boshlandi.
Shu bilan birga, respublikada atmosfera havosining ifloslanish darajasining joriy ko‘rsatkichi ma’lum bir hudud uchun ustuvor ifloslantiruvchi moddalardan kelib chiqqan holda hisoblangan atmosfera ifloslanishining kompleks indeksi (AII) hisoblanadi.
E’lon qilingan jadvallarga ko‘ra, keyingi yillarda havoning ifloslanish darajasi ortib bormoqda. Toshkent shahrining atmosfera havosidagi chang miqdori bo‘yicha ruxsat etilgan maksimal konsentratsiyadan 1,3 baravar oshib ketgan.
Shu bilan birga, 2023 yilda Toshkent shahridagi havo ifloslanishini avtomatik nazorat qiluvchi stansiyalar ma’lumotlariga ko‘ra, IQAir sayti shkalasi bo‘yicha eng ifloslangan oy — yanvar bo‘lgan.
Eslatib o‘tamiz, 22-dekabr kuni ham Toshkent havoning ifloslanish darajasi bo‘yicha dunyoning yirik shaharlari orasida 4-o‘rinni egallagandi. O‘tgan yilning 23-yanvar kuni esa Toshkent eng yomon havo bo‘yicha IQAir reytingida dunyoda uchinchi o‘ringa chiqqandi.
Izoh (0)