Fariddin Nasriyev O‘zbekistonning Erondagi favqulodda va muxtor elchisi etib tayinlangani to‘g‘risida xabar berilgandi. “Dunyo” agentligining yozishicha, yangi elchi Eron prezidenti Ibrohim Raisiyga ishonch yorliqlarini topshirgan.
Rasmiy marosim doirasida bo‘lib o‘tgan suhbat chog‘ida Eron prezidenti so‘nggi yillarda ikki tomonlama munosabatlar siyosat, parlamentlararo aloqalar, savdo va iqtisodiyot, investitsiya, innovatsiya, transport, energetika, suv va qishloq xo‘jaligi, madaniy-gumanitar sohalarida har tomonlama izchil rivojlanib, yangi darajaga ko‘tarilganini mamnuniyat bilan qayd etgan.
Shuningdek, O‘zbekiston—Eron yetakchilarining siyosiy irodasi, samarali saʼy-harakatlari hamda oliy darajadagi muzokaralar natijasida ikki tomonlama munosabatlar yanada rivojlantirishga kuchli surʼat bag‘ishlagani taʼkidlangan.
“Eron prezidenti O‘zbekiston elchisiga masʼuliyatli va sharafli faoliyatida muvaffaqiyatlar tiladi hamda mamlakatlarimiz va xalqlarimiz o‘rtasidagi munosabatlarni yanada yuksaltirishga munosib hissa qo‘shishiga ishonch bildirdi”, — deyiladi xabarda.
Fariddin Nasriyev tayinlovga qadar u 2018—2023-yillar davomida O‘zbekistonning Qozondagi Bosh konsulligiga rahbarlik qilgan. Ingliz, fransuz, rus va fors tillarida gaplasha oladigan Fariddin Nasriyev 2015—2023-yillar davomida Tehrondagi elchi lavozimida ishlab kelgan Bahodir Abdullayevning o‘rnini egallagan edi.
Izoh (0)