Namanganlik 15 yashar o‘quvchi President Tech Award tanlovida g‘oliblik uchun berilgan mukofotning bir qismini o‘zi o‘qiyotgan maktab uchun ajratishga qaror qildi. Bu haqda “Daryo” muxbiri Azizbek Abduvaliyev xabar bermoqda.
Muhammad Tojiddinov Uchqo‘rg‘on tumanidagi 3-maktabning 9-sinfida tahsil oladi. U boshchilik qilgan jamoa tanlovning “Axborot va kiberxavfsizlik texnologiyalari” yo‘nalishida “PCP raqamli qalqoni” loyihasi bilan ishtirok etib, g‘oliblar safidan o‘rin oldi va 50 ming dollar miqdoridagi mukofotni qo‘lga kiritdi.
“Maqsadimiz tizimlar va shaxslarni ishonchli himoya qilishdan iborat. Eng ilg‘or texnologiyalardan foydalanib, kiberhujumlarni o‘tmishga aylantirishni istaymiz. Loyihamiz hozircha o‘zimizda muvaffaqiyatli sinovdan o‘tdi, kelgusi yili esa jahon bozoriga chiqishni niyat qilganmiz”, — deydi Muhammad.
Muhammad jamoa aʼzolari bilan kelishib, mazkur mukofotning bir qismi — 5 ming dollarni o‘zi o‘qiyotgan maktab uchun ajratishga qaror qildi. U ushbu mablag‘ evaziga zamonaviy kompyuter sinfini tashkil etishni rejalashtirgan.
“Bu shu yerda bilim olayotgan ukalarimiz va singillarimiz axborot texnologiyalarini mukammal o‘rganishi uchun rag‘bat deb o‘ylayman. Qolaversa, onam shu maktabda 30 yildan beri ona tili va adabiyotdan dars beradilar, men shu yerda o‘sib-ulg‘ayganman, desam ham to‘g‘ri bo‘ladi”, — deydi Muhammad.
Maktab direktori Ozoda Tursunovaning taʼkidlashicha, sobiq bitiruvchilar taʼlim maskanini tez-tez yo‘qlab turishadi, xonalarni jihozlash, sinflarga televizor taqdim etish kabi xayrli ishlarga qo‘l urishgan. Biroq o‘quvchining maktabi uchun bunday tashabbus bilan chiqishi jamoaga o‘ziga xos yangilik bo‘ldi.
Izoh (0)