Наманганлик 15 яшар ўқувчи President Tech Award танловида ғолиблик учун берилган мукофотнинг бир қисмини ўзи ўқиётган мактаб учун ажратишга қарор қилди. Бу ҳақда “Дарё” мухбири Азизбек Абдувалиев хабар бермоқда.
Муҳаммад Тожиддинов Учқўрғон туманидаги 3-мактабнинг 9-синфида таҳсил олади. У бошчилик қилган жамоа танловнинг “Ахборот ва киберхавфсизлик технологиялари” йўналишида “PCP рақамли қалқони” лойиҳаси билан иштирок этиб, ғолиблар сафидан ўрин олди ва 50 минг доллар миқдоридаги мукофотни қўлга киритди.
“Мақсадимиз тизимлар ва шахсларни ишончли ҳимоя қилишдан иборат. Энг илғор технологиялардан фойдаланиб, киберҳужумларни ўтмишга айлантиришни истаймиз. Лойиҳамиз ҳозирча ўзимизда муваффақиятли синовдан ўтди, келгуси йили эса жаҳон бозорига чиқишни ният қилганмиз”, — дейди Муҳаммад.
Муҳаммад жамоа аъзолари билан келишиб, мазкур мукофотнинг бир қисми — 5 минг долларни ўзи ўқиётган мактаб учун ажратишга қарор қилди. У ушбу маблағ эвазига замонавий компьютер синфини ташкил этишни режалаштирган.
“Бу шу ерда билим олаётган укаларимиз ва сингилларимиз ахборот технологияларини мукаммал ўрганиши учун рағбат деб ўйлайман. Қолаверса, онам шу мактабда 30 йилдан бери она тили ва адабиётдан дарс берадилар, мен шу ерда ўсиб-улғайганман, десам ҳам тўғри бўлади”, — дейди Муҳаммад.
Мактаб директори Озода Турсунованинг таъкидлашича, собиқ битирувчилар таълим масканини тез-тез йўқлаб туришади, хоналарни жиҳозлаш, синфларга телевизор тақдим этиш каби хайрли ишларга қўл уришган. Бироқ ўқувчининг мактаби учун бундай ташаббус билан чиқиши жамоага ўзига хос янгилик бўлди.
Изоҳ (0)