Rossiyalik teleboshlovchi Tina Kandelakiga Qozog‘istonga kirish taqiqlandi. U Qozog‘istondagi vokzallarning rus tilidagi nomi o‘zgarayotganiga norozilik bildirib, mamlakatda “asta-sekin rus tilini davlat darajasida siqib chiqarish davom etayotganini” aytgandi. Shu bilan birga, u qozoqlarni manqurtlarga qiyoslagandi.
Qozog‘iston Tashqi ishlar vazirligi rasmiy vakili Aybek Smadiyarov rossiyalik jurnalist Tina Kandelakining Qozog‘istonga qarshi so‘nggi bayonotlariga izoh berdi. Bu haqda Ulysmedia xabar berdi.
“Davlat buni kechirmaydi”
Tashqi ishlar vazirligi rasmiy vakilidan Tina Kandelakining bayonotlariga nima uchun haligacha javob berilmagani so‘raldi.
“Jamiyat allaqachon javob bergan. Bu mavzu bir hafta davomida qizg‘in muhokama qilindi. Bunga nima qo‘shishim kerak? Eng achinarlisi, bunday bayonotlar bilan chiqqan har bir chet el fuqarosiga javob qaytarishda davom etsak, ichki muammolarimizni unutamiz. Keling, o‘zimizga e’tibor qarataylik. Ularning har biriga e’tibor qaratsak, vaqtimiz qolmaydi.
Eng haqoratlisi, qo‘shni davlatda bizning mamlakatimiz haqida bilishmaydi. Chunki ularning biz haqimizdagi ma’lumotlari noto‘g‘ri. Ijtimoiy tarmoqlarda mojaroga kirishgandan ko‘ra, o‘z ishimizni davom ettiraylik”, — dedi Aybek Smadiyarov.
Shuningdek, Tashqi ishlar vazirligining rasmiy vakili Kandelaki Qozog‘istonga kiritilmasligini ta’kidladi.
“Agar kimnidir yoqtirmasangiz, uni uyingizga kiritmaysiz. Biz ham shunday qilamiz. Kerak bo‘lsa, chora ko‘riladi. Bugun yoki ertaga shunday qiling, deb turib olmang. Davlat buni hech qachon kechirmaydi. U (Tina Kandelaki) Qozog‘istonga kelmaydi, kelsa ham kiritilmaydi”, — dedi u.
Kandelaki mojarosi
16-yanvar kuni Kandelaki Qozog‘istonda rus tilini davlat darajasida sekin-asta siqib chiqarish davom etayotganini aytdi.
Qozog‘istonlik jurnalist Dinara Satjan bunga javob berib, Qozog‘iston mustaqil suveren davlat ekanini ta’kidladi. Qozog‘iston parlamenti Majilisi deputatlari ham Kandelakini tanqid qildi.
17-yanvar kuni Kandelaki “rus tilini siqib chiqarish” haqida yangi post yozib, 2022-yil yanvar voqealarini eslatib o‘tdi. Uning fikricha, Qozog‘iston “qo‘shnilarining yordami” bo‘lmaganida, o‘z mavjudligini to‘xtatardi. Kandelaki qozoqlarni manqurtlarga qiyoslab, ularni tarixni unutmaslikka chaqirdi.
Kandelaki nima bilan mashhur?
- Tina Kandelaki 2021-yil sentyabridan “Gazprom Media” bosh direktori o‘rinbosari lavozimida ishlab kelayotgan edi.
- 2022-yil 7-fevraldan TNT telekanali direktori lavozimiga tayinlandi.
- 2022-yil 28-iyundan beri Kandelaki Rossiyaning Ukrainaga bostirib kirishi paytida tashviqot tarqatgani uchun AQSH, Ukraina va Kanada tomonidan shaxsiy sanksiyalar ostida.
Izoh (0)