Россиялик телебошловчи Тина Канделакига Қозоғистонга кириш тақиқланди. У Қозоғистондаги вокзалларнинг рус тилидаги номи ўзгараётганига норозилик билдириб, мамлакатда “аста-секин рус тилини давлат даражасида сиқиб чиқариш давом этаётганини” айтганди. Шу билан бирга, у қозоқларни манқуртларга қиёслаганди.
Қозоғистон Ташқи ишлар вазирлиги расмий вакили Айбек Смадияров россиялик журналист Тина Канделакининг Қозоғистонга қарши сўнгги баёнотларига изоҳ берди. Бу ҳақда Ulysmediа хабар берди.
“Давлат буни кечирмайди”
Ташқи ишлар вазирлиги расмий вакилидан Тина Канделакининг баёнотларига нима учун ҳалигача жавоб берилмагани сўралди.
“Жамият аллақачон жавоб берган. Бу мавзу бир ҳафта давомида қизғин муҳокама қилинди. Бунга нима қўшишим керак? Энг ачинарлиси, бундай баёнотлар билан чиққан ҳар бир чет эл фуқаросига жавоб қайтаришда давом этсак, ички муаммоларимизни унутамиз. Келинг, ўзимизга эътибор қаратайлик. Уларнинг ҳар бирига эътибор қарацак, вақтимиз қолмайди.
Энг ҳақоратлиси, қўшни давлатда бизнинг мамлакатимиз ҳақида билишмайди. Чунки уларнинг биз ҳақимиздаги маълумотлари нотўғри. Ижтимоий тармоқларда можарога киришгандан кўра, ўз ишимизни давом эттирайлик”, — деди Айбек Смадияров.
Шунингдек, Ташқи ишлар вазирлигининг расмий вакили Канделаки Қозоғистонга киритилмаслигини таъкидлади.
“Агар кимнидир ёқтирмасангиз, уни уйингизга киритмайсиз. Биз ҳам шундай қиламиз. Керак бўлса, чора кўрилади. Бугун ёки эртага шундай қилинг, деб туриб олманг. Давлат буни ҳеч қачон кечирмайди. У (Тина Канделаки) Қозоғистонга келмайди, келса ҳам киритилмайди”, — деди у.
Канделаки можароси
16 январь куни Канделаки Қозоғистонда рус тилини давлат даражасида секин-аста сиқиб чиқариш давом этаётганини айтди.
Қозоғистонлик журналист Динара Сатжан бунга жавоб бериб, Қозоғистон мустақил суверен давлат эканини таъкидлади. Қозоғистон парламенти Мажилиси депутатлари ҳам Канделакини танқид қилди.
17 январь куни Канделаки “рус тилини сиқиб чиқариш” ҳақида янги пост ёзиб, 2022 йил январь воқеаларини эслатиб ўтди. Унинг фикрича, Қозоғистон “қўшниларининг ёрдами” бўлмаганида, ўз мавжудлигини тўхтатарди. Канделаки қозоқларни манқуртларга қиёслаб, уларни тарихни унутмасликка чақирди.
Канделаки нима билан машҳур?
- Тина Канделаки 2021 йил сентябридан “Газпром Медиа” бош директори ўринбосари лавозимида ишлаб келаётган эди.
- 2022 йил 7 февралдан ТНТ телеканали директори лавозимига тайинланди.
- 2022 йил 28 июндан бери Канделаки Россиянинг Украинага бостириб кириши пайтида ташвиқот тарқатгани учун АҚШ, Украина ва Канада томонидан шахсий санкциялар остида.
Изоҳ (0)