Qozog‘iston prezidenti Qosim-Jo‘mart To‘qayev uning mamlakati “tasodifan erkinlikka erishgan” deb o‘ylamaydi, qozoq xalqi “suverenitetga olib boruvchi muqaddas yo‘ldan uzoq yillar yurib o‘tgan”. Bu haqda u Respublika kuni arafasida davlat mukofotlarini topshirish marosimida aytib o‘tdi, deb yozadi Tengrinews.
To‘qayev “Suverenitetsiz xalq ham bo‘lmaydi” degan qozoq naqlini keltirib o‘tdi. “Sir emas, ba’zan go‘yoki Qozog‘iston tasodifan ozodlikka erishgani, mamlakatimiz oxirgi bo‘lib o‘z mustaqilligini e’lon qilgani haqida yuzaki, asossiz bayonotlar yangraydi. Buni o‘sha vaqtda yuzaga kelgan vaziyatni to‘g‘ri baholashga qodir bo‘lmagan odamlargina ayta oladi”, — dedi davlat rahbari.
1990-yil 25-oktabr kuni Davlat duvereniteti haqidagi deklaratsiya — “mamlakatimiz mustaqilligiga yo‘l ochib bergan buyuk hujjat” qabul qilingan, deb eslatdi u.
“Aytish mumkinki, Suverenitet to‘g‘risidagi deklaratsiya butun xalqning ko‘p yillik umumiy sa’y-harakatlari natijasiga aylandi. Albatta, bunday qadamni tashlash oson bo‘lmagan. O‘sha davrdagi siyosiy, ijtimoiy va demografik vaziyatni hisobga olgan, bu juda dadil qadam bo‘lgan”, — deya qayd etdi prezident.
To‘qayev hujjatni “jasurlik va diplomatiya, aql va sabr g‘alabasi” deb atadi.
2020-yil dekabrida Rossiya Davlat dumasi deputati Vyacheslav Nikonov “Qozog‘iston hududi — Rossiya tomonidan berilgan katta sovg‘a” ekanini aytganidan keyin, Rossiya ishlari bo‘yicha vaqtinchalik ishonchli vakil Qozog‘iston Tashqi ishlar vazirligiga chaqirib, unga norozilik notasi topshirilgandi.
Shundan keyin Qozog‘iston prezidenti Qosim-Jo‘mart To‘qayev mamlakat hududini qozoqlarga “tashqaridan hech kim” bermagani qayd etilgan maqola yozdi.