Toshkent shahrida O‘zbekiston “Adolat” sotsial-demokratik partiyasi Siyosiy kengashining XII plenumi bo‘lib o‘tdi. Bu haqda partiya matbuot xizmati xabar berdi.
Plenumda tashkiliy masala ko‘rilib, O‘zbekiston “Adolat” sotsial-demokratik partiyasi Siyosiy Kengashi raisi Bahrom Abduhalimov o‘z arizasiga muvofiq, Siyosiy kengash aʼzolarining ochiq ovoz berish yo‘li bilan partiya Siyosiy kengashi raisi lavozimidan ozod etildi.
Shuningdek, Robaxon Mahmudova partiya Siyosiy kengashi raisi lavozimiga Siyosiy kengash aʼzolari tomonidan ochiq ovoz berish yo‘li bilan saylandi.
Robaxon Anvarovna Mahmudova, 1958-yil Farg‘onada tug‘ilgan. U mehnat faoliyatini quyi sudlardan boshlab, Oliy sud sudyasigacha bo‘lgan yo‘lni bosib o‘tgan, Jinoyat ishlari bo‘yicha Farg‘ona viloyati sudi raisi vazifasida ishlagan. 2020-yil yanvarigacha Farg‘ona viloyati Xalq qabulxonasi mudiri lavozimida faoliyat ko‘rsatgan.
2020-yilning yanvarida Farg‘ona viloyatidan senator etib saylangan, keyinroq O‘zbekiston Senatining Fan, ta’lim, sog‘liqni saqlash masalalari qo‘mitasi raisi lavozimiga saylangandi. 2020-yil mart oyida “Fidokorona mehnatlari uchun” ordeni bilan taqdirlangan.
U 2023-yilda “Adolat” sotsial-demokratik partiyasidan prezidentlikka nomzod sifatida saylovda ishtirok etgandi. Kecha, 19-yanvar kuni Robaxon Mahmudova Oliy sud raisining birinchi o‘rinbosari lavozimidan ozod etilgani to‘g‘risida xabar berilgan edi.
Izoh (0)