Oliy Majlis Qonunchilik palatasidagi “Adolat” SDP fraksiyasining navbatdagi yig‘ilishida “O‘zbekiston Respublikasining Konstitutsiyaviy sudi to‘g‘risida”gi Konstitutsiyaviy qonunga o‘zgartirish va qo‘shimchalar kiritish haqidagi qonun loyihasi ko‘rib chiqildi. Bu haqda parlament quyi palatasi matbuot xizmati xabar berdi.
Qayd etilishicha, yangi tahrirdagi Konstitutsiyada O‘zbekiston Konstitutsiyaviy sudi hamda uning vakolatlariga doir yangi normalarning belgilangani Konstitutsiyaviy sud faoliyatini yagona yondashuv asosida isloh qilish zarurligini taqozo etmoqda.
Mazkur qonun loyihasi bilan “O‘zbekiston Respublikasining Konstitutsiyaviy sudi to‘g‘risida”gi Konstitutsiyaviy qonunga Konstitutsiyaviy sud tomonidan O‘zbekiston referendumiga chiqarilayotgan masalalarning Konstitutsiyaga muvofiqligi to‘g‘risida xulosa berilishini, shuningdek, Konstitutsiyaviy sudning sudyalari qayta saylanish huquqisiz o‘n yillik muddatga saylanishini nazarda tutuvchi o‘zgartirish va qo‘shimchalar kiritilmoqda.
“Qonun loyihasi O‘zbekiston Konstitutsiyasi oliy yuridik kuchga egaligidan kelib chiqib, Konstitutsiya va qonunlarning so‘zsiz ustuvorligi hamda ularning bir xilda amalda bo‘lishini taʼminlaydi”, — deyiladi xabarda.
Fraksiya aʼzolari partiya saylovoldi dasturidagi maqsad va g‘oyalardan kelib chiqqan holda mazkur qonun loyihasi muhim konseptual hujjat ekani, ushbu yo‘nalishdagi qonunchilikning uzviyligi va davomiyligini taʼminlashda alohida ahamiyat kasb etishini eʼtirof etib, uni qo‘llab-quvvatlagan. Yig‘ilishda kun tartibidagi boshqa masalalar ham deputatlar tomonidan atroflicha ko‘rib chiqilib, tegishli qaror qabul qilingan.
May oyida prezident tomonidan imzolangan farmonda yangi tahrirdagi Konstitutsiya bo‘yicha davlat fuqarolik xizmatchilari va sud-huquq tizimi xodimlarini o‘qitish masalasi ko‘zda tutilayotgani to‘g‘risida xabar berilgandi.
Izoh (0)