Ijtimoiy tarmoqlarda Wolt yetkazib berish xizmati kuryerining kafeda buyurtmani kutish paytida pianino chalayotgan videosi tarqaldi.
Rigadagi kafelardan biriga kelgan kuryer Frederik Shopenning “Bahor valsi” kuyini ijro etayotgan videosi tarqaldi. Video shu qadar mashhur bo‘lganidan jurnalistlar kuryerdan intervyu olishga qaror qildi.
O‘zbekistonlik Hasan Azlarov 2021-yilda biznes-menejment boshqaruvi yo‘nalishi bo‘yicha magistraturada o‘qish uchun Latviyaga kelganini va bolaligidan pianino chalishini aytdi.
“O‘zbekistonda Glier nomidagi ixtisoslashgan musiqa maktabida 12 yil o‘qiganman. Keyin Toshkent teatr va rassomchilik institutini tamomladim. 2021-yilda magistraturada o‘qish xohishi paydo bo‘ldi va Latviyaga kelishga qaror qildim.
Bo‘sh vaqtimda kuryer bo‘lib ishladim. Restoranlarga borganimda, royal yoki fortepiano bo‘lsa, har doim chalganman. Bu esdan chiqarib yubormasligim uchun ham amaliyot va sizni tinglaydiganlarga kayfiyat ulashish yoqimli. Har doim odamlarga yaxshi kayfiyat ulashishga harakat qilganman”, — deydi Hasan Azlarov intervyuda.
Shuningdek, Uning o‘zi ham bundan 15 yil oldin “Umid” deb nomlangan musiqa yozgan.
“O‘ylashimcha, asarni yozgan paytlarimda inson ichki hislari va psixologiyasida o‘zgarishlar bo‘ladigan davr edi. O‘tish davridagi kechinmalar shu asarni yozishimga turtki bo‘lgan. Hozirgi kunda ham musiqa yozish ustida ishlayapman. Latviya va uning havosi ilhomlantiryapti”, — deya qo‘shimcha qilgan Azlarov.
Ijtimoiy tarmoqlardagi mashhurlikdan so‘ng, Azlarovga hamkorlik qilish takliflari tusha boshlagan. Hozirgi kunda u eski Rigadagi restoranlardan birida pianinochi bo‘lib ishlamoqda.
Izoh (0)