Ижтимоий тармоқларда Wolt етказиб бериш хизмати курьерининг кафеда буюртмани кутиш пайтида пианино чалаётган видеоси тарқалди.
Ригадаги кафелардан бирига келган курьер Фредерик Шопеннинг “Баҳор вальси” куйини ижро этаётган видеоси тарқалди. Видео шу қадар машҳур бўлганидан журналистлар курьердан интервью олишга қарор қилди.
Ўзбекистонлик Ҳасан Азларов 2021 йилда бизнес-менежмент бошқаруви йўналиши бўйича магистратурада ўқиш учун Латвияга келганини ва болалигидан пианино чалишини айтди.
“Ўзбекистонда Глиэр номидаги ихтисослашган мусиқа мактабида 12 йил ўқиганман. Кейин Тошкент театр ва рассомчилик институтини тамомладим. 2021 йилда магистратурада ўқиш хоҳиши пайдо бўлди ва Латвияга келишга қарор қилдим.
Бўш вақтимда курьер бўлиб ишладим. Ресторанларга борганимда, рояль ёки фортепиано бўлса, ҳар доим чалганман. Бу эсдан чиқариб юбормаслигим учун ҳам амалиёт ва сизни тинглайдиганларга кайфият улашиш ёқимли. Ҳар доим одамларга яхши кайфият улашишга ҳаракат қилганман”, — дейди Ҳасан Азларов интервьюда.
Шунингдек, Унинг ўзи ҳам бундан 15 йил олдин “Умид” деб номланган мусиқа ёзган.
“Ўйлашимча, асарни ёзган пайтларимда инсон ички ҳислари ва психологиясида ўзгаришлар бўладиган давр эди. Ўтиш давридаги кечинмалар шу асарни ёзишимга туртки бўлган. Ҳозирги кунда ҳам мусиқа ёзиш устида ишлаяпман. Латвия ва унинг ҳавоси илҳомлантиряпти”, — дея қўшимча қилган Азларов.
Ижтимоий тармоқлардаги машҳурликдан сўнг, Азларовга ҳамкорлик қилиш таклифлари туша бошлаган. Ҳозирги кунда у эски Ригадаги ресторанлардан бирида пианиночи бўлиб ишламоқда.
Изоҳ (0)