Somalida “Ash-Shabob” guruhi a’zolari Birlashgan Millatlar Tashkilotining vertolyotini ekipaji va yo‘lovchilari bilan birga olib qochdi. BMT matbuot kotibi Stefan Dyujarrik vertolyot o‘g‘irlab ketilganini tasdiqladi.
BMT vertolyoti Somali markazidagi Beledveyn shahridan havoga ko‘tarilib, hukumat kuchlari va “Ash-Shabob” o‘rtasidagi to‘qnashuv chizig‘i yaqinida joylashgan Visil shahriga yo‘l olgandi. Vertolyot havoga ko‘tarilganidan ko‘p o‘tmay, texnik muammo tufayli, guruh nazorati ostidagi hududga favqulodda qo‘nishni amalga oshirgan.
Vertolyotda tibbiy buyumlar bo‘lgan, u Galmudug tumanidan yarador askarlarni olib ketishi kerak edi.
Bortda olti nafar xorijlik va bir Somali fuqarosi bo‘lgan. Bir kishi qochishga urinayotganda otib tashlangan. Yana bir kishi bedarak yo‘qolgan, deb yozadi The Guardian.
Birlashgan Millatlar Tashkilotining Somalidagi yordam missiyasi zarur bo‘lganda qo‘shimcha ma’lumotlar e’lon qilinishini bildirdi.
“Ash-Shabob” guruhi Somalining janubi va markazidagi aksariyat hududni nazorat qiladi, biroq qo‘shni davlatlarga, jumladan Keniyaga qarshi ham harakat olib boradi.
2007-yildan 2012-yilgacha “Ash-Shabob” jangarilari 500 dan ortiq teraktlar uyushtirgan. 2012-yilda guruh “Al-Qoida”ga qo‘shilgan.
Izoh (0)