Somali prezidentining o‘g‘li Istanbulda kuryerni urib yubordi. Jabrlanuvchi vafot etdi (video)

Somali prezidentining o‘g‘li Muhammad Hasan Mahmud Istanbulda kuryerni urib yubordi. Jabrlanuvchi salkam bir hafta o‘tib, kasalxonada vafot etdi. 

OAV maʼlumotlariga ko‘ra, voqea 30-noyabr kuni Istanbul markazidagi Kennedi shossesida sodir bo‘lgan. Mototsiklda bo‘lgan 38 yoshli kuryer Yunus Gecher tunneldan chiqishda tezlikni pasaytira boshlagan, u yo‘l chetida to‘xtashni rejalashtirgan. 

Shu payt Somali prezidenti o‘g‘li boshqaruvidagi avtomobil mototsiklga borib urilgan. Zarbadan keyin Gecher yo‘l chetiga borib tushgan. Shifokorlarning urinishlariga qaramay jabrlanuvchi kasalxonada vafot etgan. Gecherning ikki farzandi bor, ulardan biri nogiron. Kuryerning do‘stlari kuzatuv kameralari yozuvlariga asoslanib avtohalokat vaqtida Mahmudning mashinasi tormozlashga urinmaganini ma’lum qildi. Ular Mahmudni Gecher o‘limida aybdor sifatida hibsga olishni talab qilmoqda.

Muhammad Hasan Mahmud politsiya tomonidan so‘roq qilingach qo‘yib yuborilgan, biroq unga mamlakatni tark etish huquqi vaqtincha cheklangan.