AQSH sobiq prezidenti Donald Tramp bo‘lajak prezidentlik saylovlarida g‘alaba qozonsa, Amerika tarixidagi eng yirik deportatsiyani amalga oshirishga va’da berdi. Bu haqda u Fox News telekanaliga bergan intervyusida gapirdi.
“Mamlakatimiz tarixidagi eng katta deportatsiya harakatini amalga oshiramiz”, — dedi Tramp.
Sobiq prezidentning ta’kidlashicha, hozirda Qo‘shma Shtatlarda millionlab noqonuniy muhojirlar bor.
“Nyu-Yorkda oddiy talabalarni bir chetga surib tashlab, ularning o‘rniga muhojirlarni qo‘yishayotganini ko‘rdingizmi?... Biz hammani kelgan joyiga qaytaramiz”, — deb ta’kidladi Tramp.
Avvalroq AQSH Kongressi Vakillar palatasi spikeri Mayk Jonson Jo Bayden prezident bo‘lgan davrda Amerika chegarasini 7 milliondan ortiq odam noqonuniy kesib o‘tganini aytgandi.
Fox News telekanali AQSH bojxona va chegara xizmatidagi manbalarga tayanib, 2023-yil dekabrida Meksikadan AQSHga kirgan noqonuniy migrantlar soni 302 ming kishidan oshib, mutlaq tarixiy rekord o‘rnatganini xabar qildi.
Izoh (0)