Toshkent shahri va Namangan viloyatida elektr tarmoqlariga noqonuniy ulanish holatlari fosh etilmoqda, deb xabar beradi Bosh prokuratura huzuridagi departament.
Ma’lum qilinishicha, departamentning Namangan tuman bo‘limi tomonidan ETK xodimlari bilan hamkorlikda tergovga qadar tekshiruv o‘tkazilgan. Tekshiruv davomida “M.L.” MCHJni norasmiy boshqarib kelgan J.S. va boshqalar MCHJ tosh maydalash sexining elektr hisoblagichiga tashqi taʼsir o‘tkazib, jami 483,9 million so‘mlik elektr energiyasidan noqonuniy foydalangani aniqlangan.
Shu kabi, departamentning Toshkent shahar boshqarmasi tomonidan o‘tkazilgan tergovga qadar tekshiruvda “U.” MCHJ texnik bo‘limi masʼul shaxslari va boshqalar “Qoraqamish dehqon bozori” hududidagi bino ustiga o‘rnatilgan aloqa qurilmasini umumiy foydalanishdagi elektr tarmog‘iga tijorat maqsadida ulab, jami 185,1 million so‘mlik elektr energiyasidan noqonuniy foydalangani ma’lum bo‘ldi.
Mazkur holatlar yuzasidan Jinoyat kodeksining 169-moddasi (o‘g‘rilik) bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq O‘zbekistonda dekabr oyining 15 kunida ayrim iste’molchilarning elektr energiyasi va tabiiy gazdan noqonuniy foydalanishi natijasida davlat manfaatlariga 73 milliard 274 million so‘mlik zarar yetkazilgani to‘g‘risida xabar berilgandi.
Izoh (0)