Sirdaryo viloyati Boyovut tumanida noqonuniy yo‘llar bilan o‘qishga kiritib qo‘yishni vaʼda qilgan shaxs ushlandi, deb xabar beradi Bosh prokuratura huzuridagi departament.
Ma’lum qilinishicha, departamentning Boyovut tuman bo‘limi tomonidan DXX xodimlari bilan hamkorlikda tezkor tadbir o‘tkazilgan. Tadbirda I.I. ismli shaxs fuqarolar S.M. va O.R.ning ishonchiga kirib, ularni 4 ming dollar evaziga qo‘shni Qozog‘istondagi oliy o‘quv yurtlaridan biriga o‘qishga kiritib qo‘yishni va’da qilgan. Shuningdek, u keyinchalik o‘qishni O‘zbekistondagi oliy o‘quv yurtlaridan biriga ko‘chirib berishini aytgan.
Fuqaro I.I. o‘z xizmati evaziga 3,9 ming dollar va 1,2 million so‘mni firibgarlik yo‘li bilan olgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.
Bundan oldin Buxoro va Farg‘ona viloyatlarida o‘qishni ko‘chirib berish bilan bog‘liq firibgarlik holatlariga chek qo‘yilgandi. Shuningdek, O‘zbekistonning qator hududlarida o‘qishga kiritib qo‘yish uchun pul olgan OTM xodimlari qo‘lga tushgan edi.
Izoh (0)