DXX Oliy ta’lim muassasalariga o‘qishga kiritib qo‘yishini aytib firibgarlik qilgan bir necha shaxslarni qo‘lga oldi.
Quvasoy shahridagi maxsus maktab-internati xodimi muqaddam firibgarlik bilan bog‘liq jinoyati uchun sudlangan, Farg‘ona davlat universiteti talabasi bilan o‘zaro til biriktirib, mahalliy fuqaroni mazkur oliy taʼlim muassasasining “Boshlang‘ich taʼlim va sport-tarbiyaviy ishi” yo‘nalishiga o‘qishga kiritib qo‘yish evaziga 3 400 AQSH dollari talab qilgan.
DXXning Farg‘ona viloyati bo‘yicha boshqarmasi xodimlari tomonidan Iqtisodiy jinoyatlarga qarshi kurashish departamentining hududiy boshqarmasi bilan hamkorlikda o‘tkazilgan tezkor tadbirda, maxsus maktab-internati xodimi so‘ralgan pulni olgan vaqtida ashyoviy dalillar bilan ushlangan.
Buvayda tumanida kuzatilgan holatda esa umumiy o‘rta taʼlim maktabi o‘qituvchisi yuqori lavozimda ishlovchi tanishlari orqali, Rishton tumanida yashovchi fuqaroning Qirg‘iziston oliy o‘quv yurtidagi o‘qishini Andijon davlat tibbiyot institutiga ko‘chirib berish evaziga 8 ming AQSH dollari talab qilib, oldindan 1500 dollar olgan vaqtida ushlangan.
DXXning Toshkent shahar bo‘yicha boshqarmasi xodimlari tomonidan Bosh prokuratura huzuridagi departamentning shahar boshqarmasi xodimlari bilan hamkorlikda o‘tkazilgan tezkor tadbirda, O‘zbekiston Milliy universiteti talabasi mansabdor tanishlari orqali, Nurafshon shahrida yashovchi fuqaroni Toshkent davlat iqtisodiyot universitetiga o‘qishga kiritib qo‘yish evaziga 7 500 AQSH dollari talab qilib, oldindan 4 000 dollar olgan vaqtida ashyoviy dalillar bilan ushlangan.
Boshqa bir holatda esa Buxoro innovatsiyalar universiteti xodimi mahalliy fuqaroni aldov yo‘li bilan ishonchiga kirib, uni Qirg‘izistondagi oliy o‘quv yurtida o‘qiyotganligi to‘g‘risida soxta hujjatlar tayyorlab, go‘yoki ko‘chirish yo‘li bilan Buxoro shahridagi Osiyo xalqaro universitetiga o‘qishga kiritib qo‘yish evaziga 26 million so‘m talab qiladi va oldindan 500 dollar va 14 million 400 ming so‘m olgan vaqtida ushlangan.
Bu yo‘nalishda DXXning Sirdaryo viloyati bo‘yicha boshqarmasi xodimlari ham viloyat ichki ishlar boshqarmasi xodimlari bilan hamkorlikda o‘tkazilgan tezkor tadbirda, Buxoro viloyatining Shofirkon tumanida yashovchi, 1997-yilda tug‘ilgan shaxs Guliston shahrida istiqomat qiluvchi fuqaroning ishonchiga kirib, tanishlari yordamida uni Guliston davlat universitetining “Ijtimoiy-iqtisodiy” fakultetiga o‘qishga kiritib qo‘yish evaziga 4 500 dollar olgan vaqtida ashyoviy dalillar bilan ushlangan.
Izoh (0)