Norvegiyalik terrorchi Anders Breyvik Ringerik shahridagi qattiq rejimli qamoqxonada izolyatsiyada saqlanayotganidan norozi bo‘lib, sudga da’vo arizasi bilan murojaat qildi. Bu haqda Reuters agentligi xabar qildi.
Uning advokati da’vo qilishicha, 12 yil davomida boshqa mahbuslardan ajratilgan holda saqlanayotgan Breyvikda o‘z joniga qasd qilish fikri tug‘ilgan, shuningdek, u antidepressantlarga qaram bo‘lib qolgan.
Adliya vazirligi vakillari Anders Breyvikni hali ham boshqa mahbuslardan alohida saqlash kerakligini ta’kidlamoqda, chunki u qamoqxonada xavf tug‘dirishi mumkin.
Bundan tashqari, ular terrorchi izolyatsiyada saqlanayotgani “nisbiy tushuncha” ekanini ta’kidladilar. Chunki u qo‘riqchilar, ruhoniy va tibbiyot xodimlari bilan muloqotda bo‘ladi. Bundan tashqari, yaqin vaqtgacha Anders Breyvik volontyor bilan muloqot qilib turgandi. Keyin uni boshqa ko‘rishni istamasligini ma’lum qilgan.
Reuters agentligining qayd etishicha, Anders Breyvik saqlanayotgan kamerada mashg‘ulot xonasi, oshxona, televizor va alohida vannaxona mavjud. NTB xabariga ko‘ra, Anders Breyvikka uy hayvonlari sifatida uchta to‘tiqushni saqlashga ruxsat berilgan.
“Endi u o‘z joniga qasd qilishga moyil bo‘lib qoldi. Bundan tashqari, Breyvik Prozak antidepressantiga qaram bo‘lib qolgan”, — dedi terrorchining advokati Oysteyn Storrvik.
2016-yilda Anders Breyvik ham xuddi shunday da’vo bilan sudga murojaat qilgan. O‘shanda u davlat Inson huquqlari bo‘yicha Yevropa konvensiyasini, xususan, “hech kim qiynoqlarga, g‘ayriinsoniy yoki qadr-qimmatni kamsituvchi muomala yoki jazoga duchor bo‘lishi mumkin emas” degan bandlarni buzayotganini da’vo qilgan. Anders Breyvik bu ishda g‘alaba qozondi, biroq bir yildan so‘ng sud qarori appelyatsiya tartibida bekor qilindi. Cheklovlar olib tashlanmadi.
2011-yilda Anders Breyvik siyosiy sabablarga ko‘ra qo‘shaloq terakt uyushtirib, 77 kishini o‘ldirgan va 151 kishini jarohatlagan edi. 2012-yil 24-avgustda Oslo okrug sudi uni aqli raso deb topdi va 21 yillik qamoq jazosiga hukm qildi.
Izoh (0)