2011-yilda Norvegiyada ikkita teraktni amalga oshirib, 77 kishining umriga zomin bo‘lgan Anders Breyvik (ismini Fotulfa Xansenga o‘zgartirgan) Strasburg sudiga qamoqda yolg‘iz holda saqlanayotganidan shikoyat qilish niyatida. Bu haqda NRK telekompaniyasiga tayanib, “RIA Novosti” xabar berdi.
“Terrorchining asosiy shikoyati — bu yolg‘iz holatda hibsda saqlanayotganligidan ruhiy jarohat olishi mumkinligi”, — deya tushuntirish beradi telekompaniya. Breyvik-Xansen deyarli olti yildan beri qamoqxonadagi kamerada yolg‘iz saqlanib kelinadi. U faqat qamoqxona xodimlari va advokatlar bilan muloqot qilishi mumkin.
“Shikoyatning mazmuni shundan iboratki, izolyatsiya darajasi juda yuqori va u ancha vaqtdan beri davom etmoqda”, — deydi advokat Oysten Storrvik.
Uning ta’kidlashicha, qamoqxona xodimlari bilan suhbatlashish muammoni bartaraf etmaydi. Bundan tashqari Breyvik-Xansenning fikricha, uning xati senzurada ayblangani bu ham uning huquqlarini poymol qilish hisoblanadi.
Shikoyat 13 varoqdan iborat va sudning shu turdagi hukmlarga nisbatan qo‘llagan qarorlaridan misollar keltirilgan.
Eslatib o‘tamiz, oldinroq Anders Breyvik ikki xonalidan bir xonali kameraga ko‘chirilgani va sutkaning 23 soati davomida kameradan tashqariga chiqishi taqiqlangani tufayli “o‘lguniga qadar davom etadigan” ochlik e’lon qilgani to‘g‘risida xabar berilgandi.
Izoh (0)