Норвегиялик террорчи Андерс Брейвик Рингерик шаҳридаги қаттиқ режимли қамоқхонада изоляцияда сақланаётганидан норози бўлиб, судга даъво аризаси билан мурожаат қилди. Бу ҳақда Reuters агентлиги хабар қилди.
Унинг адвокати даъво қилишича, 12 йил давомида бошқа маҳбуслардан ажратилган ҳолда сақланаётган Брейвикда ўз жонига қасд қилиш фикри туғилган, шунингдек, у антидепрессантларга қарам бўлиб қолган.
Адлия вазирлиги вакиллари Андерс Брейвикни ҳали ҳам бошқа маҳбуслардан алоҳида сақлаш кераклигини таъкидламоқда, чунки у қамоқхонада хавф туғдириши мумкин.
Бундан ташқари, улар террорчи изоляцияда сақланаётгани “нисбий тушунча” эканини таъкидладилар. Чунки у қўриқчилар, руҳоний ва тиббиёт ходимлари билан мулоқотда бўлади. Бундан ташқари, яқин вақтгача Андерс Брейвик волонтёр билан мулоқот қилиб турганди. Кейин уни бошқа кўришни истамаслигини маълум қилган.
Reuters агентлигининг қайд этишича, Андерс Брейвик сақланаётган камерада машғулот хонаси, ошхона, телевизор ва алоҳида ваннахона мавжуд. НТБ хабарига кўра, Андерс Брейвикка уй ҳайвонлари сифатида учта тўтиқушни сақлашга рухсат берилган.
“Энди у ўз жонига қасд қилишга мойил бўлиб қолди. Бундан ташқари, Брейвик Прозак антидепрессантига қарам бўлиб қолган”, — деди террорчининг адвокати Ойстейн Сторрвик.
2016 йилда Андерс Брейвик ҳам худди шундай даъво билан судга мурожаат қилган. Ўшанда у давлат Инсон ҳуқуқлари бўйича Европа конвенциясини, хусусан, “ҳеч ким қийноқларга, ғайриинсоний ёки қадр-қимматни камситувчи муомала ёки жазога дучор бўлиши мумкин эмас” деган бандларни бузаётганини даъво қилган. Андерс Брейвик бу ишда ғалаба қозонди, бироқ бир йилдан сўнг суд қарори аппеляция тартибида бекор қилинди. Чекловлар олиб ташланмади.
2011 йилда Андерс Брейвик сиёсий сабабларга кўра қўшалоқ теракт уюштириб, 77 кишини ўлдирган ва 151 кишини жароҳатлаган эди. 2012 йил 24 августда Осло округ суди уни ақли расо деб топди ва 21 йиллик қамоқ жазосига ҳукм қилди.
Изоҳ (0)