Наманган вилоят божхона бошқармаси томонидан ДХХ, ИИБ ва Миллий гвардия билан ҳамкорликда Чуст туманида тезкор тадбир ўтказилди. Бу ҳақда “Дарё” мухбири Азизбек Абдувалиев хабар бермоқда.
Фото: Наманган вилоят божхона бошқармаси
Тезкор тадбир давомида Наманган—Чуст йўналишида ҳаракатланиб келаётган Nexia русумли автотранспорт воситаси Чуст тумани, “Зарафшон” маҳалласида тўхтатилиб, холислар иштирокида кўздан кечирилди. Автомашина салонида хорижда ишлаб чиқарилган, муқаддам божхона назорати ўрнатилмаган айланма йўллар орқали олиб кирилган, акциз марка билан маркаланмаган умумий қиймати 112 500 000 сўмлик 7500 қути тамаки маҳсулотлари борлиги аниқланди.
Шундан сўнг тезкор тадбир давом эттирилиб, Янги Наманган туманида яшовчи фуқаронинг яшаш хонадони кўздан кечирилганида хонадон ертўласида хорижда ишлаб чиқарилган, айланма йўллар орқали олиб ўтилган, маркаланмаган умумий қиймати 23 150 000 сўмлик 13 турдаги жами 8210 дона тамаки маҳсулотлари борлиги аниқланди.
Ҳозирда мазкур ҳолат юзасидан суриштирув ҳаракатлари олиб борилмоқда.
Изоҳ (0)