Qozog‘istonning Uralsk shahridagi kafeda 4-yanvar kuni gaz portlashi natijasida yong‘in kelib chiqqani va bino qulab tushgani haqida xabar bergandik. Mazkur portlashda jarohatlanganlar orasida ikki nafar O‘zbekiston fuqarosi borligi ma’lum qilindi.
Shifokorlar Uralskdagi kafeda yuz bergan portlashda jarohatlanganlarning ahvolini o‘ta og‘ir deb baholamoqda. G‘arbiy Qozog‘iston viloyati sog‘liqni saqlash boshqarmasi boshlig‘i Yerlan Toksanovning aytishicha, jabrlanganlarning barchasi shifokorlar tomonidan ko‘rikdan o‘tkazilgan.
Bir kishi ambulator davolanishga yuborilgan, ikkinchisi esa yuzi va bo‘ynining yengil kuyishi bilan travmatologiya bo‘limiga yotqizilgan.
“Og‘ir kuygan to‘rt kishi reanimatsiyada. Jabrlanganlardan birida ikki tomonlama pnevmotoraks, shuningdek, o‘ng son suyagining sinishi bor”, — deya ta’kidladi u.
Bundan tashqari, ushbu to‘rt kishiga yopiq bosh jarohati va miya chayqalishi tashxisi qo‘yilgan.
“Uch nafar jabrlanuvchi 15 foizdan 52 foizgacha kuyish jarohati olgan. Ularning ahvoli o‘ta og‘ir deb baholanmoqda”, — dedi Toksanov.
Kasalxonaga yotqizilgan besh kishidan ikki nafari O‘zbekiston fuqarolari. Jarohatlanganlar 23 yoshdan 30 yoshgacha bo‘lgan, uch erkak va ikki qiz. Ikkala xorijlik ham reanimatsiyada.
G‘arbiy Qozog‘iston viloyati Favqulodda vaziyatlar boshqarmasi boshlig‘i Yernur Utegenovning so‘zlariga ko‘ra, portlash muassasa devori, shifti va tomining qulab tushishiga sabab bo‘lgan gaz-havo aralashmasidan chiqqan bo‘lishi mumkin. Oqibatda uch kishi halok bo‘lgan, yana olti kishi jarohat olib, shahar ko‘p tarmoqli shifoxonasiga yetkazilgan.
Voqea joyida G‘arbiy Qozog‘iston viloyati favqulodda vaziyatlar xizmati kuchlari, politsiya, mahalliy ijro hokimiyati organlari va tez tibbiy yordam xizmatlari, jami 110 nafardan ortiq odam va 30 birlik texnika ishlamoqda.
Izoh (0)