Afg‘oniston mudofaa vaziri vazifasini bajaruvchi Muhammad Yoqub Mujohid mamlakatda “masjidlar, namozxonlar, diniy maktablar”ga qilingan hujumlarda chet el fuqarolari, xususan, Tojikiston fuqarolari ishtirok etganini ma’lum qildi. Bu haqda Hasht-e Subh Daily xabar berdi.
Mujohidga ko‘ra, o‘tgan 12 oy davomida “Tolibon” o‘nlab Tojikiston fuqarolarini o‘ldirgan, yana yuzlab fuqarolar turli ayblovlar bilan hibsga olingan. Biroq u o‘ldirilgan va hibsga olinganlarning aniq sonini, shuningdek, ularning shaxsini ma’lum qilmagan.
Shuningdek, Mujohid Afg‘onistondagi ko‘plab teraktlarni uyushtirishda Pokiston fuqarolari ham ishtirok etganini aytdi.
“Kuchlarimiz amaliyotida 20 dan ortiq pokistonlik halok bo‘ldi, yana yuzlab odamlar qo‘lga olindi”, — dedi u.
Shu munosabat bilan u mintaqa davlatlaridan “quruqlik va havo chegaralarini jiddiy nazorat qilishni” so‘radi. Hozircha Tojikiston rasmiylari mazkur bayonotiga javob bermagan.
2023-yil aprel oyida Tojikiston Milliy xavfsizlik davlat qo‘mitasi Afg‘onistondan kelgan jangovar guruhlar tomonidan chegarani kesib o‘tishga urinish haqida xabar bergandi.
2023-yil sentyabr oyida Milliy xavfsizlik davlat qo‘mitasi Tojikiston hududida Davlat mustaqilligi kuni arafasida terrorchilik harakatlari sodir etishni istagan “Jamoat Ansorulloh” terrorchilik guruhining uch nafar aʼzosi zararsizlantirilganini yana bir bor eʼlon qildi.
“Ansorulloh” guruhi Tojikistonda terrorchi sifatida tan olingan, Afg‘onistonda faoliyat yuritadi va asosan Tojikiston fuqarolaridan iborat.
Izoh (0)