Қозоғистоннинг Уралск шаҳридаги кафеда 4 январь куни газ портлаши натижасида ёнғин келиб чиққани ва бино қулаб тушгани ҳақида хабар бергандик. Мазкур портлашда жароҳатланганлар орасида икки нафар Ўзбекистон фуқароси борлиги маълум қилинди.
Шифокорлар Уралскдаги кафеда юз берган портлашда жароҳатланганларнинг аҳволини ўта оғир деб баҳоламоқда. Ғарбий Қозоғистон вилояти соғлиқни сақлаш бошқармаси бошлиғи Ерлан Токсановнинг айтишича, жабрланганларнинг барчаси шифокорлар томонидан кўрикдан ўтказилган.
Бир киши амбулатор даволанишга юборилган, иккинчиси эса юзи ва бўйнининг енгил куйиши билан травматология бўлимига ётқизилган.
“Оғир куйган тўрт киши реанимацияда. Жабрланганлардан бирида икки томонлама пневмоторакс, шунингдек, ўнг сон суягининг синиши бор”, — дея таъкидлади у.
Бундан ташқари, ушбу тўрт кишига ёпиқ бош жароҳати ва мия чайқалиши ташхиси қўйилган.
“Уч нафар жабрланувчи 15 фоиздан 52 фоизгача куйиш жароҳати олган. Уларнинг аҳволи ўта оғир деб баҳоланмоқда”, — деди Токсанов.
Касалхонага ётқизилган беш кишидан икки нафари Ўзбекистон фуқаролари. Жароҳатланганлар 23 ёшдан 30 ёшгача бўлган, уч эркак ва икки қиз. Иккала хорижлик ҳам реанимацияда.
Ғарбий Қозоғистон вилояти Фавқулодда вазиятлар бошқармаси бошлиғи Ернур Утегеновнинг сўзларига кўра, портлаш муассаса девори, шифти ва томининг қулаб тушишига сабаб бўлган газ-ҳаво аралашмасидан чиққан бўлиши мумкин. Оқибатда уч киши ҳалок бўлган, яна олти киши жароҳат олиб, шаҳар кўп тармоқли шифохонасига етказилган.
Воқеа жойида Ғарбий Қозоғистон вилояти фавқулодда вазиятлар хизмати кучлари, полиция, маҳаллий ижро ҳокимияти органлари ва тез тиббий ёрдам хизматлари, жами 110 нафардан ортиқ одам ва 30 бирлик техника ишламоқда.
Изоҳ (0)