Andijon viloyatida ham ichimlik suvi va oqova xizmatlar bo‘yicha yangi tariflar tasdiqlandi. Bu haqda “O‘zsuvta’minot” matbuot xizmati xabar berdi.
19-sentabrda tasdiqlangan tariflarga ko‘ra, narxlar quyidagicha o‘zgaradi:
Ichimlik suvi:
- aholi uchun 1 m3 — 1 500 so‘m (amaldagi narx 750 so‘m);
- budjet tashkilotlari uchun 1 m3 — 2 400 so‘m (amaldagi narx 1 200 so‘m);
- ulgurji iste’molchilar uchun 1 m3 — 3 800 so‘m (amaldagi narx 1 800 so‘m);
Oqova suv xizmati uchun:
- aholi uchun 1 m3— 1 000 so‘m (amalda 750 so‘m);
- budjet tashkilotlari uchun 1 m3 — 2 400 so‘m (amalda 1 200 so‘m);
- ulgurji iste’molchilar uchun 1 m3 — 3 200 so‘m (amalda 1 600 so‘m).
Tasdiqlangan tariflar 15 kundan keyin kuchga kiradi.
“Xonobod shahridan Andijon shahri-yu, Ulug‘nor tumanigacha katta elektr energiyasi sarfi hisobiga yirik quvur orqali 150-200 kilometrgacha suv haydab, hatto eng chekka hududdagi xonadonlargacha olib kirib, 1 m3 (tonna) suv uchun 750 so‘m to‘lang, desa og‘rinamiz-u, lekin do‘konga kirib 1 litr hajmdagi ichimlik suv uchun 3-4 ming so‘m to‘lashga og‘rinmaymiz. Tasavvur qiling, do‘kondagi 1 litr suv 3-4 ming so‘m, ming mashaqqat bilan keladigan jo‘mrakdagi 1 m3 (tonna) suv esa 750 so‘m. Bundan ortiq arzonchilik bormi?” — deyiladi “O‘zsuvta’minot”ning to‘lovlar qiymati oshirilishi haqida bergan izohida.
Qayd etilishicha, shu arzonchilik tufayli hududlarni suvlashtirish, iste’molchilarga sifatli xizmat ko‘rsatish darajasi ko‘ngildagidek emas. Chunki istiqbolli loyihalarni amalga oshirish foydalanilgan toza ichimlik suvi hamda ko‘rsatilgan oqova suv xizmati uchun to‘lovlar hisobiga amalga oshiriladi.
Shu sababli ham Xalq deputatlari Andijon viloyat kengashining 19-sentabrdagi qaroriga asosan Andijon viloyatida foydalanilgan toza ichimlik suvi hamda ko‘rsatilgan oqova suv xizmatlari uchun to‘lovlar qiymati o‘zgartiriladigan bo‘ldi.
Bundan avval Qashqadaryo, Surxondaryo va Toshkent viloyatida ichimlik suvi va oqova xizmatlar bo‘yicha yangi tariflar tasdiqlangandi.
Izoh (0)