Ukrainaning birinchi xonimi Yelena Zelenskaya Rossiyaning 29-dekabr kuni navbatdagi yirik raketa hujumiga munosabat bildirdi. Bu haqda u X ijtimoiy tarmog‘idagi sahifasida yozdi.
Xususan, prezident rafiqasi dushman o‘qlari ostida qolgan shaharlarni sanab o‘tdi, yaradorlar va halok bo‘lganlarning oila a’zolariga hamdardlik bildirdi.
“Juda og‘ir kecha. O‘nlab raketalar va dronlarning hujumi. Dneprdagi tug‘uruqxona va savdo markazi, Kiyev va Lvovdagi uylar zarbaga uchradi. Xarkov ommaviy o‘qqa tutildi. Odessa, Zaporojye va boshqa shaharlarda portlashlar sodir bo‘ldi. Halok bo‘lganlar va yaradorlarning oila a’zolariga hamdardlik bildiraman. Biz birgamiz. Ukrainalar kuchli. Biz chidaymiz”, — dedi u.
Rossiya qo‘shinlari 29-dekabr kuni eng yirik havo hujumini amalga oshirdi. Ukraina himoyachilari dushmanning 158 havo nishonidan 114 tasini yo‘q qildi. Hujum oqibatida kamida 13 kishi halok bo‘lgan.
Zelenskiy munosabati
Ukraina prezidenti Vladimir Zelenskiy ham ommaviy hujumga munosabat bildirib, Rossiya o‘zida mavjud bo‘lgan deyarli hamma narsa bilan zarba berganini ma’lum qildi.
Uning arsenalida: “Kinjal”lar, S-300, qanotli raketalar, dronlar. Strategik bombardimonchi samolyotlar Kh-101/X-505 uchirdi, — dedi u.
Zelenskiyning so‘zlariga ko‘ra, raketa hujumi paytida Rossiya Ukrainaga 110 ga yaqin jangovar kallaklarni otgan, nishonlarning aksariyati ukrainalik himoyachilar tomonidan urib tushirilgan.
“Afsuski, o‘qqa tutish oqibatida halok bo‘lganlar va yaradorlar bor. Barcha xizmatlar kuchaytirilgan rejimda ishlamoqda va odamlarga zarur yordam ko‘rsatilmoqda. Halok bo‘lganlarning oila aʼzolari va yaqinlariga hamdardlik, jarohatlanganlarga tezroq sog‘ayib ketishni tilayman. Biz terrorchilarga ularning hujumlari uchun javob qaytaramiz. Mamlakatimiz, har bir shahar, butun xalqimiz xavfsizligini ta’minlash uchun kurashamiz. Rossiya terrori mag‘lub bo‘lishi kerak — aynan shunday bo‘ladi”, — deya ta’kidladi prezident.
Izoh (0)