Toshkent shahrida bojxonachilari 6,3 milliard so‘mlik tamaki mahsulotlarining noqonuniy aylanmasiga chek qo‘ydi. Bu haqda Davlat bojxona qo‘mitasi matbuot xizmati xabar berdi.
Ma’lum qilinishicha, Bojxona qo‘mitasining Kontrabandaga qarshi kurashish boshqarmasi xodimlari Davlat xavfsizlik xizmati, Ichki ishlar vazirligi va Milliy gvardiya xodimlari bilan hamkorlikda Toshkent shahri hududida tezkor tadbir o‘tkazgan.
Tezkor tadbirda oldindan kuzatuvga olingan shaxsning Mirzo Ulug‘bek tumanidagi o‘z xonadoni va ijaraga olingan xonadoni belgilangan tartibda va xolislar ishtirokida ko‘zdan kechirilganida, bu yerda xorijda ishlab chiqarilgan, muqaddam noqonuniy yo‘llar bilan respublikaga olib kirilgan 6 nomdagi 421 500 quti tamaki mahsulotlari saqlanayotgani aniqlangan.
Aksiz markasi va raqamli markirovka kodlari bilan qadoqlanmagan mazkur sigaretlarning umumiy qiymati dastlabki hisob-kitoblarga ko‘ra 6 milliard 329 million so‘mdan oshmoqda. Holat yuzasidan tergovga qadar tekshiruv harakatlari davom ettirilmoqda.
Avvalroq Xorazmda 422 million so‘mlik aksiz markasiz tamaki mahsulotlari aniqlangani, Navoiy va Buxoroda 600 mln so‘mlik qalbaki aksiz markali alkogol mahsulotlari savdosining oldi olingani to‘g‘risida xabar berilgandi.
Izoh (0)