Navoiy va Buxoro shaharlarida qalbaki aksiz markali alkogol mahsulotlarining muomalaga kiritilishiga chek qo‘yildi, deb xabar beradi Bosh prokuratura huzuridagi departament.
Qayd etilishicha, departamentning Navoiy viloyat boshqarmasi, IIB va bojxona boshqarmasi xodimlari hamkorligida tezkor tadbir o‘tkazilgan. Tadbirda Navoiy shahrida faoliyat yurituvchi “R.B.” savdo ishlab chiqarish korxonasiga qarashli savdo do‘koni va omborxonasida 19 xil turdagi jami 9 326 dona umumiy bahosi 466,3 million so‘mlik qalbaki aksiz markali alkogol mahsulotlari sotish uchun tayyorlab qo‘yilgani aniqlanib, ushbu mahsulotlar ashyoviy dalil sifatida olingan.
Shu kabi, departamentning Buxoro shahar bo‘limi tomonidan o‘tkazilgan tezkor tadbirda fuqaro S.SH. Xalqlar do‘stligi ko‘chasidagi fuqaro A.B.ning xonadoni omborxonasini ijaraga olib, ushbu omborxonada jami 6 800 dona umumiy bahosi 133,2 million so‘mlik qalbaki aksiz markali alkogol mahsulotini sotish maqsadida saqlab kelayotgani aniqlangan.
Mazkur holatlar yuzasidan Jinoyat kodeksining 176-moddasi (qalbaki pul, aksiz markasi yoki qimmatli qog‘ozlar yasash, ularni o‘tkazish) va 186-1-moddasi (etil spirti, alkogolli mahsulot va tamaki mahsulotini qonunga xilof ravishda ishlab chiqarish yoki muomalaga kiritish) bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq Qoraqalpog‘iston Respublikasi va Farg‘ona viloyatida qalbaki aksiz markali alkogol mahsulotlarini muomalaga kiritilishining oldi olingani to‘g‘risida xabar berilgandi.
Izoh (0)