Namangandan Toshkentga olib ketilayotgan salkam yarim milliard so‘mlik tamaki mahsulotlari to‘xtatib qolindi

Namangan viloyati Pop tumanida aksiz markasiz tamaki mahsulotlari to‘xtatib qolindi, deb xabar beradi Bosh prokuratura huzuridagi departament.

Ma’lum qilinishicha, departamentning Pop tuman bo‘limi tomonidan tuman IIB va soliq inspeksiyasi xodimlari bilan hamkorlikda “Namangan muntazam” YPX maskanida tezkor tadbir o‘tkazilgan. Tadbirda fuqarolar I.A. va O.O. o‘zaro til biriktirib, O.O.ning Isuzu rusumli avtotransport vositasida umumiy bahosi 477 million so‘mlik 4 xil turdagi jami 49 480 quti aksiz markasiz tamaki mahsulotlarini Toshkent shahriga sotish maqsadida olib ketayotgan vaqtida ashyoviy dalillar bilan ushlangan.

Mazkur holat yuzasidan Jinoyat kodeksining 186-1-moddasi (etil spirti, alkogolli mahsulot va tamaki mahsulotini qonunga xilof ravishda ishlab chiqarish yoki muomalaga kiritish) bilan jinoyat ishi qo‘zg‘atilib, tergov harakatlari o‘tkazilmoqda.

Avvalroq Xorazmda 422 million so‘mlik aksiz markasiz tamaki mahsulotlari aniqlangani, Navoiy va Buxoroda 600 mln so‘mlik qalbaki aksiz markali alkogol mahsulotlari savdosining oldi olingani to‘g‘risida xabar berilgandi.