Ukrainaning umumiy davlat qarzi noyabr oyida o‘tgan oyga nisbatan 4,5 milliard dollarga oshib, 140,8 milliard dollarga yetdi. Bu haqda Oliy Rada soliq qo‘mitasi rahbari Daniil Getmantsev xabar berdi.
30-noyabr holatiga ko‘ra, davlat va davlat tomonidan kafolatlangan qarz 5122,5 milliard grivna yoki 140,8 milliard dollarga yetdi.
“Noyabr oyida davlat qarzining o‘sishi tezlashdi, bir oy davomida davlat qarzi 3,3 foizga oshdi: qo‘shimcha 164,3 milliard grivna yoki 4,5 milliard dollar”, — dedi Getmantsev.
Deputatning ta’kidlashicha, 2023-yil oxiriga kelib davlat qarzining yalpi ichki mahsulotga nisbati 2022-yildagi 78,4 foiz va 2021-yildagi 48,9 foiz o‘rniga qariyb 85 foizni tashkil etadi. Davlat qarzining o‘sishiga, jumladan, Yevropa Ittifoqidan makromoliyaviy yordamning navbatdagi transhi va Jahon bankining kreditini jalb qilish ta’sir ko‘rsatdi.
Ukraina Moliya vazirligining noyabr oyi oxirida xabar berishicha, Ukrainaning umumiy davlat qarzi oktyabr oyida o‘tgan oyga nisbatan 2,72 milliard dollarga oshib, rekord darajadagi 136,35 milliard dollarga yetgandi.
Izoh (0)