Cobalt, Damas va Labo uchun qancha shartnoma tuzilgani maʼlum qilindi

UzAutoMotors 2,5 soat ichida Cobalt, Damas va Labo avtomobillari uchun jami 25 mingtadan ortiq shartnomalar tuzilganini maʼlum qildi.

Kompaniya bugun, 25-dekabr kuni soat 14:00 da uchta ommabop modeldagi avtomobillarga kontraktatsiya ochilishini xabar qilgandi. Soat 16:30 holatiga ko‘ra, qariyb 25 mingta shartnomani onlayn ravishda tuzishga erishilgan. 

Xabar berilishicha, shartnoma tuzish jarayonida UzAutoSavdo onlayn-savdo tizimi 6 ming 740 ta kiberhujumga uchragan.

“Umuman olganda, tizimda ushbu vaqt oralig‘ida 2 milliondan ortiq faol seanslar va soniyada 7 mingdan ortiq yangi seanslar qayd etildi. Ushbu davr mobaynida kompaniyaning Call-markazi tomonidan 1 ming 500 ta murojaatlar qabul qilinib, ko‘rib chiqildi”, — deyiladi xabarda.

Avvalroq kompaniya 22-dekabr soat 12:00 da ommabop avtomobillarning 2024-yilgi butun ishlab chiqarish rejasi uchun onlayn kontraktatsiya boshlanishi maʼlum qilingandi. Keyin UzavtoSavdo tizimida soat 10:00 dan boshlab qator tashqi taʼsirlar kuzatildi va buning natijasida tizimga murojaatlar soni 1 soniyada 60 mingtagacha yetdi.

Bildirilishicha, UzavtoSavdo tizimiga avtomobillar uchun kontraktatsiya boshlangandan so‘ng qilingan davomli kiberhujumlar, avtorizatsiya so‘rovlarini qayta ishlashda muammolarni yuzaga keltirgan. Bu o‘z navbatida, onlayn savdo tizimining to‘liq bloklanishiga olib kelgan.