Украинанинг умумий давлат қарзи ноябрь ойида ўтган ойга нисбатан 4,5 миллиард долларга ошиб, 140,8 миллиард долларга етди. Бу ҳақда Олий Рада солиқ қўмитаси раҳбари Даниил Гетманцев хабар берди.
30 ноябрь ҳолатига кўра, давлат ва давлат томонидан кафолатланган қарз 5122,5 миллиард гривна ёки 140,8 миллиард долларга етди.
“Ноябрь ойида давлат қарзининг ўсиши тезлашди, бир ой давомида давлат қарзи 3,3 фоизга ошди: қўшимча 164,3 миллиард гривна ёки 4,5 миллиард доллар”, — деди Гетманцев.
Депутатнинг таъкидлашича, 2023 йил охирига келиб давлат қарзининг ялпи ички маҳсулотга нисбати 2022 йилдаги 78,4 фоиз ва 2021 йилдаги 48,9 фоиз ўрнига қарийб 85 фоизни ташкил этади. Давлат қарзининг ўсишига, жумладан, Европа Иттифоқидан макромолиявий ёрдамнинг навбатдаги транши ва Жаҳон банкининг кредитини жалб қилиш таъсир кўрсатди.
Украина Молия вазирлигининг ноябрь ойи охирида хабар беришича, Украинанинг умумий давлат қарзи октябрь ойида ўтган ойга нисбатан 2,72 миллиард долларга ошиб, рекорд даражадаги 136,35 миллиард долларга етганди.
Изоҳ (0)