Тошкентда 31 ёшли эркак қўлида гулдаста билан яланғоч ҳолда кўча айлангани ҳақида хабар берилганди. Бош прокуратуранинг “Дарё”га маълум қилишича, мазкур эркак одам ўлдириб қўйган.
4 август куни Юнусобод тумани, 11-мавзе ҳудудида, 1992 йилда туғилган Т.А. қўлида гулдаста билан яланғоч ҳолда жамоат жойида ҳаракатланиб, бу хатти-ҳаракати билан фуқаролар норозилигини келтириб чиқарган.
Ҳолат юзасидан Юнусобод тумани ИИО ФМБ томонидан ўтказилган текширув жараёнида фуқаро Т.А. Тошкент шаҳар Руҳий-асаб касалликлар гуруҳи шифокори томонидан кўрикдан ўтказилган. Кўрик натижасида Т.А.нинг руҳиятида бузилиш аниқлангани сабабли фуқаро шаҳар руҳий-асаб касалликлар шифохонасига юборилган.
Фуқаро шифохонадан қочиб кетиб, Намангандаги товуқ фабрикаларидан бирига бориб, у ерда яшаб, ишлай бошлаган. Фабрика қоровули билан гап талашиб, эркак қоровулни пичоқлаб ўлдирган.
Руҳий-асаб касалликлар шифохонаси томонидан унга “аралаш диссосиатив бузилиш” ташхиси қўйилиб, жиноятни ақли норасо ҳолатида содир этган деб топилган ва мажбурий даволанишга муҳтожлиги ҳисобга олиниб, у мажбурий даволанишга юборилган. Ҳолат юзасидан иш ноябрь ойида судга юборилган.
Изоҳ (0)