Toshkent shahrida 27-dekabr kuni bemor bolalarga ko‘mak beruvchi “Sen kuchlisan” xayriya aksiyasida onkologik va gematologik kasalliklarga chalingan bolalar tomonidan chizilgan suratlar sotuvga qo‘yildi. Bu haqda “Daryo” muxbiri xabar bermoqda.
Mazkur loyiha orqali bolalar va ularning yaqinlariga moddiy hamda ma’naviy ko‘mak berish maqsad qilingan. Unda xayriya qilmoqchi bo‘lgan shaxs ko‘rgazmaga qo‘yilgan biror rasmni istalgan narxga sotib olishi yoki auksionda qatnashib surat xarid qilishi mumkin.
Mazkur xayriya aksiyasining navbatdagi tadbirini o‘tkazish Oliy ta’lim, fan va innovatsiyalar vazirligining tashabbusi bilan amalga oshirildi. Tadbirda “Vaqf” jamg‘armasi vakillari va vazirlik tomonidan bolalarga esdalik sovg‘alari topshirildi.
Tadbirda yosh rassomlar bir saf bo‘lib, bevosita ishtirok etishdi va sotilgan suratlar pullari shu vaqtning o‘zida ularga topshirildi.
Auksiondagi asosiy lot bo‘lgan “Umid” nomli surat yuqori baholandi. O‘zini tanishtirmagan va telefon orqali auksionda qatnashgan xaridor bilan tadbirda ishtirok etgan savobtalab inson o‘rtasida kuchli kurash ketdi. 1 million so‘mdan boshlangan kimoshdi savdosi 21 million so‘mga yetganda to‘xtatildi va zaldagi Bobur Rahimov ismli yigit uni xarid qildi.
Sirli xaridor ham hammani hayratda qoldirdi — 21 million taklif qilinganini eshitib, u ham shuncha miqdorda xayriya qilishini bildirdi.
Tadbir tashkilotchilarining “Daryo”ga ma’lum qilishicha, “Umid” nomli suratni sotib olgan shaxs 21 million so‘mni to‘lab, rasmni xayriya tashkilotchilariga qaytarib bergan.
“Umid”ning tarixi
“Umid” nomli bu suratda oqqonga chalingan 12 nafar bolaning qo‘l izlari tushirilgan. Afsuski bu bolalarning 11 nafari olamdan o‘tgan.
Izoh (0)