Toshkentda soliq organlari tomonidan noqonuniy undirilgan 400 mln so‘m mablag‘ tadbirkorga qaytarildi

Toshkent shahrida biznes-ombudsman yordamida 400 million so‘m mablag‘ tadbirkorga qaytarildi. Bu haqda biznes-ombudsman matbuot xizmati xabar berdi.

Qayd etilishicha, poytaxtda faoliyat ko‘rsatuvchi tadbirkor Toshkent shahar soliq boshqarmasi xodimlari xatti-harakatidan norozi bo‘lib biznes-ombudsmanga murojaat qilgan.

Aniqlanishicha, Toshkent shahar soliq boshqarmasi tomonidan kameral soliq tekshiruvi o‘tkazilib, jamiyat hisob raqamidan qariyb 400 million so‘m yechib olingan.

Murojaatda ko‘rsatilgan masala yuzasidan soliq organiga yuborilgan qonuniy talablar asosida jamiyat hisob varaqasida mavjud bo‘lgan foyda solig‘i bo‘yicha 340,9 million so‘m va SORJ (Soliq organlarini rivojlantirish jamg‘armasi) bo‘yicha 53,6 million so‘m mablag‘larni jamiyat hisob raqamiga qaytarish yuzasidan soliq organi tomonidan xulosalar tayyorlanib, tuman g‘aznachilik bo‘limiga yuborilgan. Natijada pul mablag‘lari jamiyat hisob raqamiga qaytgan.

Avvalroq “Daryo” manbasi Soliq qo‘mitasi markaziy apparatining bir qator xodimlari tergovga chaqirilganini ma’lum qilgandi.