Тошкентда солиқ органлари томонидан ноқонуний ундирилган 400 млн сўм маблағ тадбиркорга қайтарилди

Тошкент шаҳрида бизнес-омбудсман ёрдамида 400 миллион сўм маблағ тадбиркорга қайтарилди. Бу ҳақда бизнес-омбудсман матбуот хизмати хабар берди.

Қайд этилишича, пойтахтда фаолият кўрсатувчи тадбиркор Тошкент шаҳар солиқ бошқармаси ходимлари хатти-ҳаракатидан норози бўлиб бизнес-омбудсманга мурожаат қилган.

Аниқланишича, Тошкент шаҳар солиқ бошқармаси томонидан камерал солиқ текшируви ўтказилиб, жамият ҳисоб рақамидан қарийб 400 миллион сўм ечиб олинган.

Мурожаатда кўрсатилган масала юзасидан солиқ органига юборилган қонуний талаблар асосида жамият ҳисоб варақасида мавжуд бўлган фойда солиғи бўйича 340,9 миллион сўм ва СОРЖ (Солиқ органларини ривожлантириш жамғармаси) бўйича 53,6 миллион сўм маблағларни жамият ҳисоб рақамига қайтариш юзасидан солиқ органи томонидан хулосалар тайёрланиб, туман ғазначилик бўлимига юборилган. Натижада пул маблағлари жамият ҳисоб рақамига қайтган.

Аввалроқ “Дарё” манбаси Солиқ қўмитаси марказий аппаратининг бир қатор ходимлари терговга чақирилганини маълум қилганди.