Navoiyda 24-dekabr kuni Cobalt gaz balloni portladi. Mashinaning portlashdan keyin holati aks etgan video ijtimoiy tarmoqlarda tarqaldi.
Viloyat IIBB matbuot xizmatining xabar berishicha, voqea 24-dekabr soat 09:50 larda yuz bergan. Fuqaro F.D o‘z boshqaruvida bo‘lgan Cobalt avtomashinasi bilan Qiziltepa tumanidagi “Burger” kafesi oldidagi avtoturargohda bo‘lgan vaqtda mashinaga o‘rnatilgan metan gaz balloni portlab ketishi oqibatida haydovchi F.D. va uning 3 yoshli farzandi R.Sh turli darajadagi tan jarohatlari olib, tuman Tibbiyot birlashmasiga yotqizilgan.
Voyaga yetmagan R.Sh.ga ko‘rsatilgan tibbiy muolajalarga qaramay u shifoxonaning jonlantirish bo‘limida vafot etgan.
Hozirda holat yuzasidan Qiziltepa tumani IIB tergov bo‘limi tomonidan tergovga qadar tekshiruv harakatlari olib borilmoqda.
Navoiy viloyati IIB barcha fuqarolardan avtomashinalarga gaz ballonlarini o‘rnatishda uning texnik jihatdan sozligi va to‘g‘ri o‘rnatilishiga katta e’tibor qaratishlarini so‘radi.
Izoh (0)