Дания шимолида Блохус ва Родхус қишлоқлари яқинидаги соҳилда 24 декабрь, якшанба куни эрталаб ўн минглаб жуфт пойабзал топилди.
“Шанба куни қирғоқ тоза эди”, — дейди инспектор Томас Дурлоо Дания ДР телеканалига. Дурлоо бу манзарани ақл бовар қилмас деб таърифлади.
Назоратчи 14 километрлик соҳил чизиғида тартибни сақлашга масъул: топилмалар бутун чизиқ бўйлаб сочилган. Дурлоо пойабзалдан ташқари, тиббий буюмлар ва пластикларни топди.
“Қадоқланмаган товарлар Шимолий денгизнинг шўр суви томонидан деярли ярқосиз ҳолга келтирилган, аммо уларни ўғирлашга уринаётган одамларга бунинг аҳамияти йўқ”, — деди Дурлоо.
Унинг таъкидлашича, пойабзал ва бошқа буюмлар денгизда юк ташишга ихтисослашган Maersk компаниясига тегишли деб ишонилмоқда.
22 декабрь, жума куни компаниянинг энг йирик контейнер кемаларидан бири Mayview Maersk Шимолий денгизда бўронга дуч келиб, кемадаги камида қирқта 40 футлик контейнер сувга қулаб тушди, деб ёзади The Maritime Executive. Компания юк кемасидаги одамлар ва кеманинг ўзи жабрланмаганини маълум қилди.
Яна бир соҳил инспектори Андреас Расмусен ўзи назорат қиладиган ҳудудга тўртта контейнер чиқариб ташланганини айтди. Соҳил бўйлаб сочилган товарлар орасида музлатгичлар, совитгичлар ва дори-дармонлар бор.
Maersk контейнерларни қидириш ва қирғоққа чиқариб ташланган нарсаларни йиғиш учун маҳаллий компанияни ёллаганини маълум қилди.
Томас Дурлоо ҳам, Андреас Расмусен ҳам журналистларга илгари бундай ҳодисани сира кўрмаганини айтди. Дурлоонинг хизматга келганига уч ой ҳам бўлмаган, бироқ бунгача отаси 30 йил шу лавозимда ишлаган. 30 йил давомида Дурлоо кўрган ягона йирик ҳодиса қирғоққа чиққариб ташланган кит эди.
Изоҳ (0)