“Tegmanglar, savdosini qilaversin. Siz bilan meni oldimga yordam so‘rab kelmayapti-ku?” — Namangan hokimi

Namangan shahrining yangi tayinlangan hokimi Anvarjon Otaxo‘jayev mutasaddilar bilan birgalikda shahardagi “Sardoba” bozorini aylandi. Bu haqda “Daryo” muxbiri Azizbek Abduvaliyev xabar bermoqda.

Shu asnoda hokim bozor atrofidagi hududda savdo qilayotgan yoshlar bilan ko‘rishgan.

Bularga imkoniyat yaratib berolmadikmi, hech yo‘q sharoit qilib beraylik. Ularga tegmanglar. Yangi yil arafasida savdosini qilsin. Siz bilan meni oldimga yordam so‘rab kelmayapti-ku? Tirikchilik qilaman deb ko‘chaga chiqqan. Ularni qo‘llab-quvvatlaylik. Sizlar ham yo‘lni to‘smay, bozorga kelganlarga xalaqit bermay savdo qilinglar, ro‘yxatdan o‘tish esdan chiqmasin”, — degan shahar hokimi.

Mazkur bozorning ichki va tashqi qismlarida obodonlashtirishga eʼtibor qaratish, favqulodda holatlarda harakatlanish yo‘laklarini tartibga keltirish bo‘yicha vazifalar belgilandi.

Shahar hokimi bozor atrofidagi avtomashinalarning harakatlanishida tartib-qoidalariga rioya etish, xaridorlarga qulaylik yaratish, bozor yaqinidagi ko‘chalarda tirbandliklarga chek qo‘yish, yangi ko‘p qavatli avtoturargoh va piyodalar harakatlanishi uchun yo‘laklar tashkil etish bo‘yicha masʼullariga tegishli ko‘rsatmalar bergan.