AQSH Isroilning G‘azodagi jangovar harakatlar intensivligini kamaytirishga roziligini ma’lum qildi

Isroil rasmiylari G‘azo sektoridagi janglar tempini pasaytirish zarurligini anglamoqda, biroq bu aynan qachon sodir bo‘lishi hozircha noma’lum, dedi Oq uy Milliy xavfsizlik kengashining strategik aloqalar bo‘yicha koordinatori Jon Kirbi.

“Isroil tomoni jangovar harakatlarning boshqa bosqichiga o‘tish zarurligini ta’kidlamoqda. Men har qanday harbiy amaliyotda turli xil taktikalardan foydalanishni nazarda tutyapman, bu harbiy harakatlarni o‘tkazish uchun standart amaliyot hisoblanadi”, — dedi u.

Kirbi bu holatda gap jangovar harakatlar intensivligini kamaytirish haqida ketayotganini ma’lum qildi, biroq Isroil buni qachon amalga oshirishini bilmasligini tan oldi.

Oq uy vakilining so‘zlariga ko‘ra, agar Isroil tomoni shunday qadam tashlashga qaror qilsa, bu kelajakda Falastin—Isroil mojarosini hal qilishning “eng yaxshi natijasi”ga erishishga yordam beradi.