Аргентина президенти Хавьер Милей иқтисодиётни давлат томонидан тартибга солишни қисқартиришга қаратилган 366 та ислоҳотни назарда тутувчи фармонни имзолади, деб хабар бермоқда Аргентина телеканали C5N.
Милей 20 декабрь куни Аргентина телевидениесида фармон имзолангани ҳақида эълон қилди. Унинг аниқлик киритишича, ислоҳотлар “мамлакатни вайрон қилган репрессив институционал ҳуқуқий базани” ўзгартиришга қаратилган. Шунингдек, у ёзда қонун лойиҳалари пакетини кўриб чиқадиган Конгресснинг навбатдан ташқари сессияларини чақиришини маълум қилди.
Журналистлар билан суҳбатда президент фармонга киритилган 366 та ислоҳотдан атиги 30 тасини санаб ўтди. Хусусан, Милей давлат компанияларини хусусийлаштиришга тўсқинлик қилувчи қоидаларни бекор қилмоқчи. Президент томонидан таклиф этилаётган ислоҳотлар, иқтисодиётнинг туризм ва автомобиль соҳаси, футбол клублари фаолиятини тартибга солиш, ер қонунчилиги, Фуқаролик ва тижорат кодексларига ҳам тааллуқлидир. Бундан ташқари, Хавьер Милей озиқ-овқат дўконларида харидлар ва рақобат қонунларини бекор қилишни таклиф қилмоқда.
Аввалроқ Аргентина Иқтисодиёт вазири Луис Капуто президент Милейнинг иқтисодий ислоҳотлари доирасида миллий валюта – песо икки баравардан ортиқ девальвация қилиниши ва давлат харажатлари кескин камайиши ҳақида маълум қилганди.
Изоҳ (0)